سلسلة العناية ..3.. تفتيح المنطقة الحساسة, الهالات السوداء و مناطق الجسم المختلفة

سلسلة العناية ..3.. تفتيح المنطقة الحساسة, الهالات السوداء و مناطق الجسم المختلفة

--------------------------------------------------------------------------------

بسم الله الرحمن الرحيم

أخواتي الغاليات

موضوعنا اليوم عن مشكلة مهمه جدا بتبحث جميع النساء عن حلها

وهي تفتيح مناطق الجسم المختلفة

المناطق اللي دايما بتشتكي النساء من غمقان لونها وهي

حوالين العين = الهالات السوداء

الكوع والركبتين

اسمرار المناطق الحساسة والإبطين

بقع سمراء بعد حب الشباب

الكلف ( بقع سمراء كبيره بالخدين أو بالرقبة أو حوالين الفم )

طبعا كل منطقة ليها علاج معين وليها طرق للتعامل معاها وليها طرق عناية مختلفة

هانتكلم عن كل منطقة بالتفصيل

أولا: الهالات السوداء حول العين

لازم نعرف أسباب ظهور الهالات السوداء حول العين علشان نتجنب سببها

من أسباب ظهورها

1- وراثية .. ودي الأكثر شيوعا وعلاجها صعب جدا جدا

2- الأنيميا وفقر الدم

3- السهر

4- الجلوس أمام شاشة التلفزيون والكمبيوتر فترات كثيرة

5- بعض أدوبة وقطرات العين بتسبب هالات سودا زي قطرات علاج الماية الزرقا (الجلوكوما) بتسبب هالات سوداء شديدة كمان بتغير لون العين نفسه

العلاج

طبعا نتجنب الأسباب السابقة

يعني

1- الإهتمام بالتغذية ولو ألزم الأمر ممكن حبوب حديد أو فيتامينات

2- تجنب السهر

3- شرب الحليب جدا مهم

4- تجنب الجلوس أمام التلفزيون لفترات طويلة

5- من العلاجات الطبيعية كمادات الشاي البارد وكمادات قشر الخيار

6- العلاجات الطبية

الهالات السودا من الصعب علاجها لكن فيه كريمات فعلا بتخففها شويه

كريم جينوفي K

Genove K cream

بيستخدم مره واحده ليلا يوميا

ثانيا: إسمرار المنطقة الحساسة والإبطين

لازم الأول نعرف إن المنطقة الحساسة طبيعي يكون فيها تلون بسيط ولون الجلد فيها بيكون غامق شويه عن لون الجلد الطبيعي

من أسباب إسمرار المنطقة الحساسة والإبطين الآتي

1- زيادة الوزن وبالتالي كثرة الإحتكاك بين الفخذين

2- حدوث إلتهابات فطرية وعدم الإهتمام بعلاجها فبتؤدي إلى إسمرار الجلد (إسمرار بعد الإلتهابات)

3- إستخدام مزيلات العرق التي تحتوي على كيماويات وعطور

5- استخدم العطور مباشرة على الجلد

6- استخدام الفوط الصحية أثناء الدورة الشهرية مدة طويلة .. المفروض الفوطة بتتغير كل 4 ساعات

7- ارتداء ملابس داخلية غير قطنية ..ألياف صناعية مثلا بتسبب اسمرار الجلد

العلاج

1- لازم ارتداء ملابس داخليه قطنية طويلة (شورت) ومقاسها بالظبط على الجلد

2- تخفيف الوزن

3- الإهتمام بنظافة المنطقة وإزالة الشعر بأي وسيلة مثل موس الحلاقة النسائي أو السويت

4- الحفاظ على المنطقة جافة بعد كل حمام ..لازم تجففي المنطقة كويس من الماء

5- علاج أي إلتهابات سواء جلدية أو مهبلية خصوصا الفطريات لأن بيكون مصاحب معاها حكة شديدة وبالتالي بتؤدي إلى إسمرار

6- ممنوع استخدام مزيلات العرق اللي بتحتوي على كيماويات وعطور

7- العلاج الطبي

أولا لازم نعالج الإلتهابات الموجودة زي التينيا

ثانيا كريمات التفتيح

فيه كريمات تفتيح كتير جدا بالصيدليات منها الغالي والماركات ومنها الطبي العادي

هاقولكم أسماء المعتمد منها

الكريمات دي فعلا حلوه وجابت نتايج حلوه مع بنات كتير

ملاحظة: أي كريم تفتيح لازم يستخدم حوالي شهرين أو 3 شهور مش أقل من كدا

وهاتبدي تلاحظي نتيجة بعد شهر او شهر ونصف .. علشان فيه بنات بتسأل استخدمت الكريم اسبوعين ومالاقيتش نتيجة؟ دا طبيعي لأن النتيجة بتبدأ تبان بعد شهر تقريبا

طبعا كريمات التفتيح زيها زي أي كريم لو حسيتي بحكة أو إحمرار معناها عندك حساسية من الكريم وقفيه معناها مانسبكيش

كريمات التفتيح لاتستخدم على مناطق كبيره بالجسم

يعني ماينفعش واحده تستخدمها على كل جسمها لتفتيحة غلط جدا وممنوع

1- كريم أفالون المبيض للتفتيح Avalon cream

كريم أفالون تقريبا كان لونه أبيض وبعدها جددوا بشكله وبقى لونه برتقالي وفيه منه تركيزين 4% و2%

طبعا الأفضل تركيز 2% علشان يكون خفيف على البشرة

ومعاه كريم هيدروكورتيزون أسيتيت 0.1% أو كريم إلوكوم أو وقت اللزوم لو حسيتي بحكة أو بإلتهاب

أو تاخدي نقطه من أفالون ونقطة من الهيدروكورتيزون وتخلطيهم كويس وتدهني بيهم المنطقة الحساسة مره ليلا وتغسليها الصبح

2- كريم إلدوكين 2%

فيه منه تركيزين 2 و4%

استخدمي تركيز 2%

ومعاه كريم إليكوم أو هيدروكورتيزون وقت اللزوم

تاخدي نقطه من دا ونقطه من دا وتخلطيهم وتدلكي بيها المنطقة الحساسه تدليك كويس لحد مايتشرب الخليط قبل النوم

ملحوظة : ممنوع خلط الكريمات كلها ووضعها بالثلاجة ..لأن بيحصلها تأكسد

لازم تخلطي كمية صغيره فقط وقت الإستخدام

ملحوظة : لازم نستخدم كورتيزون خفيف زي الإليكوم أو الهيدروكورتيزون علشان يقلل أي التهاب هاينتج من كريم التفتيح وتقللي من حساسية الجلد تجاة كريمات التفتيح شويه

ملحوظة: نقطة صغيره جدا من كريم التفتيح بتكفي مع التدليك الجيد

أو أي كريم تفتيح من اللي هاقولهم بعد شويه

أما للمصريات

بنصح بكريم فولدكس لأنه متوفر بمصر فقط وتقريبا مش متوفر بالسعودية

Foldex cream

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 600x450 و بحجم 96KB.

دا
مكوناته طبيعيه وبيستخدم لوحده وفيه منه للبشره وللمنطقة الحساسة متوفر بالصيدليات المصرية
وسعره 45 جنيه مصري

وأعتقد إنه مش متوفر بالسعودية

ثالثا:تفتيح الوجه وتوحيد اللون

كريمات التفتيح بتشيل التصبغات الجلدية الناتجة عن حرارة الشمس يعني بترجع البشرة لطبيعتها

يعني مش بتغير اللون وتحوله لأبيض ..لالا .. هي بتفتح اللون وتصفي الوجه

زي

= أفالون كريم 2% لتفتيح الجلد

= إلدوكين 2%

= وايت أوبجيكتيف كريم White objective cream أو وايت أوبجيكتيف سيروم
من شركة بيوديرما
ودا حلو كمان للي فيهم تصبغات زي الكلف لأنه بيقشر تقشير خفيف أو مع وجود تجاعيد بيكون ممتاز جدا

= يونيتون 4 Unitone4

من شركة إيزيس فارما

ودا فيه منه نوعين

يونيتون4 بالهيدروكينون

و

يونيتون 4 بالأربيوتين << دي مادة طبيعية من مستخلصة من النباتات بديله لمادة الهيدروكينون وليها نفس تأثيرها

= كريم بليندينج بليتشينج blending bleaching cream

من شركة سكين تيكSkin tech بس دا بيحتاج استخدام مستمر لأن مكوناته طبيعية جدا فبيحتاج 3 شهور استخدام متواصل

ملحوظة:كريمات التفتيح كلها تستخدم مره ليلا لمدة شهرين متواصل وهاتبدي تلاحظي نتيجة التفتيح بعد شهر او شهر ونص من الإستخدام بإذن الله

مع عدم التعرض للشمس أو حرارة البوتاجاز أو الإضاءة النيون البيضاء

ولو تعرضتي للشمس لازم تستخدمي واقي من اشعة الشمس درجة حماية 50 أو أكتر

من أحلى الكريمات الواقية من أشعة الشمس

UVE Block 50 plus أو 80 لوشن

يو في بلوك 50 بلس أو 80 من شركة إيزيس فارما (isis pharma)

وخدي بالك إن فيه منه الأبيض وفيه منه ملون بيج زي كريم الأساس

تستخدمي قبل الخروج ب ربع ساعة بكمية وفيرة على البشرة وتكرريه كل 3 ساعات لو كنتي بالشمس أو وانتي منتهيه من الشغل ورايحه على البيت أو غسلتي وجهك

رابعا: بقع سمراء بعد حب الشباب

كريم ديفيرين 0.1% Differin 0.1% cream

مره ليلا مع عدم التعرض للضوء

بطرف إصبعك تاخدي نقطه من الكريم وتحطيها على البقع فقط مره ليلا قبل النوم مع عدم التعرض لأي إضاءة

وصباحا تغسلي وجهك كويس بصابونة لحب الشباب زي صابونة أكني إيد أو صابونة نيتروجينا لحب الشباب
أو صابونة الكبريت

ولو حصل إي إلتهاب نتيجة للتقشير بتستخدمي كريم إلوكوم Elocom cream
وقت اللزوم لما تلاقي حكة أو إلتهاب ناتج من التقشير

لمدة أسبوعين

لو لاحظتي إن لسه البقع مستمرة استخدمي كريم تفتيح مع كريم ديفرين من كريمات التفتيح السابقة

خامسا: الكلف

دا علاجه صعب شويه ومحتاج متابعة لأنه مش بس بيحتاج تفتيح

لكنه بيحتاج تقشير كمان للجلد بكريمات زي ريتين A أو كريم أكريتين مع كريمات التفتيح مع نسبة بسيطة كورتيزون خفيف يفتح ويقلل الإلتهاب الناتج

يعني دا له خلطه لوحده بتتعمل وقت الإستخدام أول بأول

لو واحده بتشتكي من كلف تقولي وانا اشرحلها واتابع معاها العلاج لأنه محتاج متابعة دقيقة

سادسا: إسمرار الكوع والركبتين

نتيجة إن الكوع والركبتين من أماكن الضغط المستمر فهي عرضة للإسمرار حتى بعد ماتاخدي كورس علاج وتفتيح فهي هاتعاود الإسمرار مره أخرى لأن طبيعة الجلد بالمنطقة دي غامق شوية وكمان لأنها منطقة ضغط

فلازم ننتبه للضغط عليها وقت العلاج وبعد العلاج علشان ماترجعش تسمر بزيادة

الكوع والركبتين بنستخدم كريمين

واحد يقشرها وواحد يفتح

تقشير لأن فيه تراكم للجلد الميت بالركبتين وبالكوعين وبالتالي بيكون فيه خشونة وتراكم للصبغات >>اسمرار

كريم كالميوريد مرتين باليوم دا مقشر خفيف جدا

ومعاه تستخدمي إلدوكين2% كريم
مره يوميا ليلا

أو أفالون2% كريم
مره ليلا

ومعاها كريم إليكوم وقت اللزوم لو حسيتي بحكة أو إلتهاب

العلاج دا لمدة شهرين هاتلاقي نتيجة ممتازة بإذن الله

مع الترطيب المستمر بكريم ثقيل زي جليسوليد

فيه كريمات ثانية زي الديبروساليك بنات بتستخدمها لتفتيح الركب والكوعين هو فعلا بيقشر وبيفتح لكن بعد ماتوقفيه بيرجع يسمر تاني..كمان لأن نوع الكورتيزون فيه متوسط فماينفعش يستخدم لمدة طويلة
فيستخدم لو فعلا الركب محتاجاة ..يعني لو فيها طبقات جلد ميت سميكة
فلو حد حابب يستخدمه يبقى لمدة أسبوع فقط كمقشر يعني محفز للتقشير فقط على الأماكن بالركب عليها طبقات جلد مين سميكة محتاجة تقشير
مع كريم كالميوريد وكريم أفالون المفتح

=-=-=-=-=

طبعا فيه كريمات تفتيح كتير وممتازة

بس دول اللي بحب أكتبهم دايما ومعتمداهم وشوفت نتيجتهم على بنات كتير

وبنفس الوقت علاج بسيط وحنين على البشرة مش قاسي ولا بيسبب إلتهابات ولاشئ

لو أي أخت محتاجه أي استفسار أو بتستخدم أي كريم تفتيح آخر أو خلطة وحابه تعرف تأثيرها وفايدتها تكتبها وأنا بالخدمة
اختكم نور الايمان
العالم عرب 30

يسلموا

موضوع جميل والله ومنسق اووى

وتقبل المرورور

شكرا لمرورك بصفحتي نورتها